Flaska í haus

Markmið:

Að læra nöfn og hafa gaman.

Aldursmörk:

Frá 10 ára

Gögn:

Tvær plastflöskur.

Leiklýsing:

Byrjað er á að hópurinn fari í hring. Farinn er nafnahringur áður en leikurinn byrjar. Til að byrja með er notast er við eina flösku. Kennari eða leiðbeinandi útskýrir leikinn og að það megi ekki lemja með flöskunni, einungis slá laust. Leikurinn gengur út á það að sá sem „er’ann“ stendur í miðjunni með flöskuna, sá sem stjórnar leiknum byrjar á að kalla upp eitt nafnanna og sá sem heldur á flöskunni hleypur að þeirri manneskju (sá sem á nafnið sem kallað var upp) í þeim tilgangi að slá með flöskunni í höfuðið á honum. Sá á að segja nafn á öðrum í hringnum áður en hann er sleginn og þá hleypur sá sem er með flöskuna að þeim næsta. Síðan gengur þetta koll af kolli. Ef sá sem er með flöskuna nær að slá áður en annað nafn er sagt fer sá sem var með flöskuna í hringinn og sá sem sleginn var í fer í miðjuna. Leikurinn flækist síðan aðeins þegar tvær flöskur eru notaðar og þar af leiðandi tveir í miðjunni.

Útfærsla:

Ef farið er í leikinn með hóp sem þekkist ekki er hægt að fara hringinn og hver og einn segir eitthvað tvennt eða þrennt um sig og þá má nota þau atriði í stað nafns í leiknum.

Heimild:
Leikur númer: 366
Sendandi: Berglind Ósk, Berglind Þóra, Birna Ósk og Ragnheiður Alma

Deila